jis raaz ko duniya jaanti hai duniya se chhupata rahta hun

jis raaz ko duniyā jāntī hai duniyā se chhupātā rahtā huuñ

vo hote haiñ har sū jalva-numā maiñ aañkh bachātā rahtā huuñ

tum mujh se na pūchho haal mirā maiñ ashk bahātā rahtā huuñ

jo aag nahīñ bujh saktī hai vo aag bujhātā rahtā huuñ

haal un kā mujhe mā'lūm nahīñ kuchh aur merā mafhūm nahīñ

aksar ye nazar se guzrā hai nazroñ meñ samātā rahtā huuñ

us zauq-e-tajassus ke qurbāñ 'ālam se judā hai rāhravī

har gaam ye apne rahbar ko ik raah batātā rahtā huuñ

ye rāz-o-niyāz-e-mai-kHāna kyā samjhegā koī dīvāna

vo mujh ko pilāte rahte haiñ maiñ un ko pilātā rahtā huuñ

vo hañste haiñ maiñ rotā huuñ hai 'ishq meñ ye kaisā 'ālam

vo aag lagāte rahte haiñ maiñ aag bujhātā rahtā huuñ

ulfat kī kahānī duniyā meñ 'bahzād' koī suntā hī nahīñ

ḳhud apne hī dil ko apnā hī afsāna sunātā rahtā huuñ

jis raaz ko duniya jaanti hai duniya se chhupata rahta hun

wo hote hain har su jalwa-numa main aankh bachata rahta hun

tum mujh se na puchho haal mera main ashk bahata rahta hun

jo aag nahin bujh sakti hai wo aag bujhata rahta hun

haal un ka mujhe ma'lum nahin kuchh aur mera mafhum nahin

aksar ye nazar se guzra hai nazron mein samata rahta hun

us zauq-e-tajassus ke qurban 'alam se juda hai rahrawi

har gam ye apne rahbar ko ek rah batata rahta hun

ye raaz-o-niyaz-e-mai-kHana kya samjhega koi diwana

wo mujh ko pilate rahte hain main un ko pilata rahta hun

wo hanste hain main rota hun hai 'ishq mein ye kaisa 'alam

wo aag lagate rahte hain main aag bujhata rahta hun

ulfat ki kahani duniya mein 'bahzad' koi sunta hi nahin

KHud apne hi dil ko apna hi afsana sunata rahta hun