mujhe ghairon mein na sharik kar meri chahaton ko nakar kar

mujhe ġhairoñ meñ na sharīk kar mirī chāhatoñ ko nakār kar

mujhe apne aap meñ DhūñD tū mujhe mukHlisoñ meñ shumār kar

mirī chāhatoñ pe yaqīn kar mire 'ishq kā hai ḳhudā gavāh

mujhe apne dil meñ tū de jagah mire haq meñ soch-vichār kar

maiñ huuñ munhamik tirī yaad meñ mujhe ek pal bhī sukūñ nahīñ

mire qalb ko tū sukūn de mire paas aa mujhe pyaar kar

mirī dhaḌkanoñ kī pukār sun mirī zindagī kī tū ain ban

maiñ rafīq huuñ tire dard kā mirī zaat ko tū na zaar kar

ġham-e-hijr kī tū na baat kar yuuñ na mujh pe kar tū mubāh ġham

tū na duur jā na mujhe satā mirī chashm-e-nam tū na yaar kar

zamīñ āsmāñ bhī haiñ kam bahut mire 'ishq kī tū karāñ na pūchh

jo maiñ duuñ tujhe kabhī koī ġham to shikāyateñ tū hazār kar

maiñ huuñ qāfiya tū radīf hai maiñ ḳhayāl huuñ tū ’arūz hai

mirā ho ke tū mirī zindagī kī ġhazal kā ūñchā vaqār kar

maiñ jo sochtā huuñ use kabhī to ye mujh se kahtā hai dil mirā

hai udaas kis liye 'rahbar' ab use phir se dekh pukār kar

mujhe ghairon mein na sharik kar meri chahaton ko nakar kar

mujhe apne aap mein DhunD tu mujhe mukHlison mein shumar kar

meri chahaton pe yaqin kar mere 'ishq ka hai KHuda gawah

mujhe apne dil mein tu de jagah mere haq mein soch-wichaar kar

main hun munhamik teri yaad mein mujhe ek pal bhi sukun nahin

mere qalb ko tu sukun de mere pas aa mujhe pyar kar

meri dhaDkanon ki pukar sun meri zindagi ki tu ain ban

main rafiq hun tere dard ka meri zat ko tu na zar kar

gham-e-hijr ki tu na baat kar yun na mujh pe kar tu mubah gham

tu na dur ja na mujhe sata meri chashm-e-nam tu na yar kar

zamin aasman bhi hain kam bahut mere 'ishq ki tu karan na puchh

jo main dun tujhe kabhi koi gham to shikayaten tu hazar kar

main hun qafiya tu radif hai main KHayal hun tu ’aruz hai

mera ho ke tu meri zindagi ki ghazal ka uncha waqar kar

main jo sochta hun use kabhi to ye mujh se kahta hai dil mera

hai udas kis liye 'rahbar' ab use phir se dekh pukar kar