toD ke jate hain rishte na nibhane wale

toḌ ke jaate haiñ rishte na nibhāne vaale

yaad aate haiñ sadā chhoḌ ke jaane vaale

thī mohabbat kī ramaq un kī nigāhoñ meñ kabhī

ab to āñkheñ hī dikhāte haiñ milāne vaale

ham se ulfat hai unheñ aur nibhā.eñge vo

kah ke jaate haiñ yahī pyaar jatāne vaale

zindagānī maiñ karūñ apnī tire naam magar

kah ke ye baat bane tum bhī rulāne vaale

us ne gar merī mohabbat ko jalāyā hai to

jal bhī sakte haiñ kisī roz jalāne vaale

tum ne ḳhushiyoñ meñ to har vaqt mirā saath diyā

ġham meñ kyuuñ chhoḌ ga.e ġham ko miTāne vaale

pyaar kā diip maiñ hāthoñ meñ liye baiThā huuñ

kyuuñ nahīñ aate haiñ ab us ko jalāne vaale

un kī yādoñ meñ hai mashġhūl mirā dil har dam

aur yaqīñ hai mujhe ā.eñge vo aane vaale

she'r-goī meñ tū kyuuñ Duub gayā hai 'rahbar'

ab tujhe kahte haiñ shā'ir ye zamāne vaale

toD ke jate hain rishte na nibhane wale

yaad aate hain sada chhoD ke jaane wale

thi mohabbat ki ramaq un ki nigahon mein kabhi

ab to aankhen hi dikhate hain milane wale

hum se ulfat hai unhen aur nibhaenge wo

kah ke jate hain yahi pyar jatane wale

zindagani main karun apni tere nam magar

kah ke ye baat bane tum bhi rulane wale

us ne gar meri mohabbat ko jalaya hai to

jal bhi sakte hain kisi roz jalane wale

tum ne KHushiyon mein to har waqt mera sath diya

gham mein kyun chhoD gae gham ko miTane wale

pyar ka dip main hathon mein liye baiTha hun

kyun nahin aate hain ab us ko jalane wale

un ki yaadon mein hai mashghul mera dil har dam

aur yaqin hai mujhe aaenge wo aane wale

she'r-goi mein tu kyun Dub gaya hai 'rahbar'

ab tujhe kahte hain sha'ir ye zamane wale