talawwun tera roz hum dekhte hain

talavvun terā roz ham dekhte haiñ

sitam dekhte haiñ karam dekhte haiñ

mohabbat kī nazroñ se dushman ko dekhā

na dekhā ye tum ne ki ham dekhte haiñ

muravvat hai paidā kisī kī nazar meñ

ye terā asar chashm-e-nam dekhte haiñ

na laate kabhī lab pe harf-e-tamannā

tumhārī nigāh-e-karam dekhte haiñ

tumheñ dekh kar shān-e-haq ham ne dekhī

ye kyā aur ahl-e-haram dekhte haiñ

kahīñ dil hamārā na uljhā huā ho

tirī zulf ke pech-o-ḳham dekhte haiñ

vo dekhā hai jo kuchh dikhāyā ḳhudā ne

abhī dekheñ kyā aur ham dekhte haiñ

tamannā bar aa.ī hai 'bedil' hamārī

'alam un kī teġh-e-do-dam dekhte haiñ

talawwun tera roz hum dekhte hain

sitam dekhte hain karam dekhte hain

mohabbat ki nazron se dushman ko dekha

na dekha ye tum ne ki hum dekhte hain

murawwat hai paida kisi ki nazar mein

ye tera asar chashm-e-nam dekhte hain

na late kabhi lab pe harf-e-tamanna

tumhaari nigah-e-karam dekhte hain

tumhein dekh kar shan-e-haq hum ne dekhi

ye kya aur ahl-e-haram dekhte hain

kahin dil hamara na uljha hua ho

teri zulf ke pech-o-KHam dekhte hain

wo dekha hai jo kuchh dikhaya KHuda ne

abhi dekhen kya aur hum dekhte hain

tamanna bar aai hai 'bedil' hamari

'alam un ki tegh-e-do-dam dekhte hain