faqat main hi nahin aashiq ki meri jaan-e-jaan tum ho

faqat maiñ hī nahīñ 'āshiq ki merī jān-e-jāñ tum ho

jahāñ kī hai nazar tum parda mahbūb-e-jahāñ tum ho

tumhārā husn-e-zebā hai bahār-e-gulshan-e-jannat

ḳhudā shāhid hai us kā hāsil-e-bāġh-e-jināñ tum ho

tumhāre nām-levā haiñ sabhī aadam se 'iisā tak

samajh meñ aa gayā ījād bazm-e-kun-fakāñ tum ho

jo tum ne jalva-gāh-e-husn āñkhoñ ko banāyā hai

ye kaisī parda-dārī hai ki phir dil meñ nihāñ tum ho

añdhere se hameñ marqad ke ai māh-e-'arab kyā Dar

ujālā hī ujālā hai jahāñ tum ho jahāñ tum ho

tumhīñ nūr-e-ilāhī ho tumhīñ ho bā'is-e-ḳhilqat

tumhīñ se hai zuhūr us kā nishān-e-be-nishāñ tum ho

na aa.egā vahāñ to kaam koī yār-o-be-gāna

qayāmat ke magar haamī shafī'-e-'āsiyāñ tum ho

tumhāre dard-e-furqat se banī hai jaan par merī

marā jaatā huuñ furqat meñ mirī rūh-e-ravāñ tum ho

'abas hai zohd-o-taqvā kī tumheñ to fikr ai 'bedil'

yahī kaafī vasīla hai nabī ke mad.h-ḳhvāñ tum ho

faqat main hi nahin 'ashiq ki meri jaan-e-jaan tum ho

jahan ki hai nazar tum parda mahbub-e-jahan tum ho

tumhaara husn-e-zeba hai bahaar-e-gulshan-e-jannat

KHuda shahid hai us ka hasil-e-bagh-e-jinan tum ho

tumhaare nam-lewa hain sabhi aadam se 'isa tak

samajh mein aa gaya ijad bazm-e-kun-fakan tum ho

jo tum ne jalwa-gah-e-husn aankhon ko banaya hai

ye kaisi parda-dari hai ki phir dil mein nihan tum ho

andhere se hamein marqad ke ai mah-e-'arab kya Dar

ujala hi ujala hai jahan tum ho jahan tum ho

tumhin nur-e-ilahi ho tumhin ho ba'is-e-KHilqat

tumhin se hai zuhur us ka nishan-e-be-nishan tum ho

na aaega wahan to kaam koi yar-o-be-gana

qayamat ke magar hami shafi'-e-'asiyan tum ho

tumhaare dard-e-furqat se bani hai jaan par meri

mara jata hun furqat mein meri ruh-e-rawan tum ho

'abas hai zohd-o-taqwa ki tumhein to fikr ai 'bedil'

yahi kafi wasila hai nabi ke madh-KHwan tum ho