tera jalwa hai aankhon mein hai teri justuju mujhko

tirā jalva hai āñkhoñ meñ hai terī justujū mujh ko

tamannā hai tire dil meñ hai terī aarzū mujh ko

nahīñ bhātī chaman meñ aab guloñ kī guftugū mujh ko

nazar aayā na gulshan meñ vafā kā rañg-o-bū mujh ko

nazāra chashm-e-mai-gūñ kā hai mere vāste kaafī

nahīñ darkār ai saaqī tirā jām-o-subū mujh ko

tajallī mehr-e-raḳhshāñ kī ho paidā zarra-zarra meñ

jidhar dekhūñ nazar aa.e ilāhī tū hī tū mujh ko

ye ramz-e-husn-o-ulfat kuchh samajh hī meñ nahīñ aatī

jo hai begāna mujh se hai usī kī aarzū mujh ko

tirī mehrāb-e-abrū meñ azal se sar-ba-sajda huuñ

namāz-e-'ishq kā hai aaj tak taaza vuzū mujh ko

tirā parda tirā parda nahīñ phir kyuuñ chhupā mujh se

nazar aayā dil-o-dīda meñ terā rañg-o-bū mujh ko

sadā-e-tūr kā mushtāq maiñ bhī misl-e-mūsā huuñ

dil-o-jāñ se na kyuuñ pyārī ho terī guftugū mujh ko

hai chāhat kā mazā us meñ mohabbat us ko kahte haiñ

tamannā ho mirī tum ko tumhārī aarzū mujh ko

tire kūche meñ miTnā ḳhaak honā sar-bulandī hai

farishtoñ par milī hai ḳhaak ho kar aabrū mujh ko

tirī teġh-e-nazar ke vaar jab rah rah ke hote haiñ

to phir chāk-e-jigar kī hai 'abas fikr-e-rafū mujh ko

samajh kar tujh ko ham-mashrab pata kī baat kahtā huuñ

fidā hai jis pe tū 'bedil' hai us kī aarzū mujh ko

tera jalwa hai aankhon mein hai teri justuju mujh ko

tamanna hai tere dil mein hai teri aarzu mujh ko

nahin bhati chaman mein aab gulon ki guftugu mujh ko

nazar aaya na gulshan mein wafa ka rang-o-bu mujh ko

nazara chashm-e-mai-gun ka hai mere waste kafi

nahin darkar ai saqi tera jam-o-subu mujh ko

tajalli mehr-e-raKHshan ki ho paida zarra-zarra mein

jidhar dekhun nazar aae ilahi tu hi tu mujh ko

ye ramz-e-husn-o-ulfat kuchh samajh hi mein nahin aati

jo hai begana mujh se hai usi ki aarzu mujh ko

teri mehrab-e-abru mein azal se sar-ba-sajda hun

namaz-e-'ishq ka hai aaj tak taza wuzu mujh ko

tera parda tera parda nahin phir kyun chhupa mujh se

nazar aaya dil-o-dida mein tera rang-o-bu mujh ko

sada-e-tur ka mushtaq main bhi misl-e-musa hun

dil-o-jaan se na kyun pyari ho teri guftugu mujh ko

hai chahat ka maza us mein mohabbat us ko kahte hain

tamanna ho meri tum ko tumhaari aarzu mujh ko

tere kuche mein miTna KHak hona sar-bulandi hai

farishton par mili hai KHak ho kar aabru mujh ko

teri tegh-e-nazar ke war jab rah rah ke hote hain

to phir chaak-e-jigar ki hai 'abas fikr-e-rafu mujh ko

samajh kar tujh ko ham-mashrab pata ki baat kahta hun

fida hai jis pe tu 'bedil' hai us ki aarzu mujh ko