bhala meri zaban kis tarh banti tarjuman meri

bhalā merī zabāñ kis tarh bantī tarjumāñ merī

tumhārā husn-e-zebā ban gayā sharh-e-bayāñ merī

hadīs-e-'ishq niklī jab khulī ramz-e-nihāñ merī

nahīñ thā qissa-e-majnūñ koī ye dāstāñ merī

'ajab dīd-e-tamāsha hai ki nazroñ meñ bayāñ sab ho

dam-e-nazzāra hairat se banīñ āñkheñ zabāñ merī

ta.ālallāh mirī qismat shahīd-e-nāze-hazrat hoñ

'arūs-e-mahr-e-mayyat par hai kaisī gul-fashāñ merī

ba-vaqt-e-naza.a aa jaa.e nabī ke sāmne sūrat

ilāhī aabrū rah jaa.e vaqt-e-imtihāñ merī

maiñ dil hī dil meñ rotā huuñ yahī sachchī nadāmat hai

nahīñ gosh-e-asam se bhī zarā ūñchī fuġhāñ merī

'ajab dāġh-e-ġham-e-furqat ne dil meñ gul khilā.e haiñ

bahār-e-be-ḳhizāñ se kyuuñ na ho baḌh kar ḳhizāñ merī

vahāñ bhī kaam ban jaa.e ḳhudā-rā aap ke muñh se

banegī dushman-e-jānī jahāñ ḳhud hī zabāñ merī

nikālūñ kis tarah dil se maiñ apnī hasrateñ 'bedil'

mere tābūt-e-armāñ par yahī haiñ nauha-ḳhvāñ merī

bhala meri zaban kis tarh banti tarjuman meri

tumhaara husn-e-zeba ban gaya sharh-e-bayan meri

hadis-e-'ishq nikli jab khuli ramz-e-nihan meri

nahin tha qissa-e-majnun koi ye dastan meri

'ajab did-e-tamasha hai ki nazron mein bayan sab ho

dam-e-nazzara hairat se banin aankhen zaban meri

taalallah meri qismat shahid-e-naze-hazrat hon

'arus-e-mahr-e-mayyat par hai kaisi gul-fashan meri

ba-waqt-e-naza aa jae nabi ke samne surat

ilahi aabru rah jae waqt-e-imtihan meri

main dil hi dil mein rota hun yahi sachchi nadamat hai

nahin gosh-e-asam se bhi zara unchi fughan meri

'ajab dagh-e-gham-e-furqat ne dil mein gul khilae hain

bahaar-e-be-KHizan se kyun na ho baDh kar KHizan meri

wahan bhi kaam ban jae KHuda-ra aap ke munh se

banegi dushman-e-jaani jahan KHud hi zaban meri

nikalun kis tarah dil se main apni hasraten 'bedil'

mere tabut-e-arman par yahi hain nauha-KHwan meri