gar mayassar ruKH-e-pur-nur ka jalwa hota

gar mayassar ruḳh-e-pur-nūr kā jalvā hotā

sadqa ho jaatā fidā hotā maiñ shaidā hotā

dur-e-dandāñ kī mohabbat meñ jo royā hotā

mere ashkoñ pe fidā 'iqd-e-surayyā hotā

baḳht-e-bargashta usī dam merā sīdhā hotā

ik ishārā jo tirī chashm-e-'atā kā hotā

ġham-e-ulfat meñ tire kHuub baraste motī

kaash dil meñ mere bahtā huā dariyā hotā

zulf-e-jānāñ ke liye dil kī haqīqat kyā thī

jaan bhī detā agar jaan pe saudā hotā

daur chalte haiñ tirī bazm meñ aksar saaqī

ek sāġhar kā to mujh ko bhī ishārā hotā

jab.ha-sā.ī jo tere dar kī mayassar hotī

tā.ir-e-baḳht mirā uḌ ke surayyā hotā

mujh ko taiba se jo le jaate farishte sū-e-ḳhuld

aañkh uThā kar na kabhī ḳhuld ko dekhā hotā

'umr-bhar bhūle rahe rahmat-e-haq par 'bedil'

kuchh to tā'at kā bhī mahshar meñ sahārā hotā

gar mayassar ruKH-e-pur-nur ka jalwa hota

sadqa ho jata fida hota main shaida hota

dur-e-dandan ki mohabbat mein jo roya hota

mere ashkon pe fida 'iqd-e-surayya hota

baKHt-e-bargashta usi dam mera sidha hota

ek ishaara jo teri chashm-e-'ata ka hota

gham-e-ulfat mein tere kHub baraste moti

kash dil mein mere bahta hua dariya hota

zulf-e-jaanan ke liye dil ki haqiqat kya thi

jaan bhi deta agar jaan pe sauda hota

daur chalte hain teri bazm mein aksar saqi

ek saghar ka to mujh ko bhi ishaara hota

jabha-sai jo tere dar ki mayassar hoti

tair-e-baKHt mera uD ke surayya hota

mujh ko taiba se jo le jate farishte su-e-KHuld

aankh uTha kar na kabhi KHuld ko dekha hota

'umr-bhar bhule rahe rahmat-e-haq par 'bedil'

kuchh to ta'at ka bhi mahshar mein sahaara hota