qatl-gah mein uTh gaya jab chashm-e-qatil ka lihaz

qatl-gah meñ uTh gayā jab chashm-e-qātil kā lihāz

jaan kī parvā kise hai ab kise dil kā lihāz

thā kabhī pahle hameñ bhī zulf-e-qātil kā lihāz

uTh gayā dil se hamāre ab salāsil kā lihāz

jaan kā khaTkā na ġham apnā na kuchh dil kā lihāz

ab balā kartī hai apnī chashm-e-qātil kā lihāz

sāmne majnūñ ke to parda haTā de sārbāñ

bhaaḌ meñ jaaye terī lailā-e-mahmil kā lihāz

vo kareñ bejā sitam ham nāz-bardārī kareñ

kyā kareñ majbūr haiñ hai tab’-e-mā.el kā lihāz

shikva kaisā ho taqāza bhī to kaT jaa.e zabāñ

ham ko ab tak hai tumhāre 'ahd-e-bātil kā lihāz

vaar ḳhālī us kā jaa.e ho gavārā kis tarah

ban gayā qātil hamārā teġh-e-qātil kā lihāz

dekhtā huuñ roz-o-shab us meñ tamāshā yaar kā

ā.īna ko chāhiye karnā mere dil kā lihāz

chashm-e-lailā bhī agar ban jaa.e majnūñ kā ḳhayāl

kuchh na parde kā rahe phir kuchh na mahmil kā lihāz

‘be-dil’-e-kHasta bhalā phir māñgne aa.egā kab

chāhiye ai banda-parvar aise saa.el kā lihāz

qatl-gah mein uTh gaya jab chashm-e-qatil ka lihaz

jaan ki parwa kise hai ab kise dil ka lihaz

tha kabhi pahle hamein bhi zulf-e-qatil ka lihaz

uTh gaya dil se hamare ab salasil ka lihaz

jaan ka khaTka na gham apna na kuchh dil ka lihaz

ab bala karti hai apni chashm-e-qatil ka lihaz

samne majnun ke to parda haTa de sarban

bhaD mein jaye teri laila-e-mahmil ka lihaz

wo karen beja sitam hum naz-bardari karen

kya karen majbur hain hai tab’-e-mael ka lihaz

shikwa kaisa ho taqaza bhi to kaT jae zaban

hum ko ab tak hai tumhaare 'ahd-e-baatil ka lihaz

war KHali us ka jae ho gawara kis tarah

ban gaya qatil hamara tegh-e-qatil ka lihaz

dekhta hun roz-o-shab us mein tamasha yar ka

aaina ko chahiye karna mere dil ka lihaz

chashm-e-laila bhi agar ban jae majnun ka KHayal

kuchh na parde ka rahe phir kuchh na mahmil ka lihaz

‘be-dil’-e-kHasta bhala phir mangne aaega kab

chahiye ai banda-parwar aise sael ka lihaz