KHuda ko yaad kar kyun multaji hai kimiya-gar se

ḳhudā ko yaad kar kyuuñ multajī hai kīmiyā-gar se

ki sonā ḳhaak se hotā hai paidā laa'l patthar se

ġhazab meñ jaan hai har-dam du'ā karatā huuñ dāvar se

mohabbat jaa.e dil se ye balā nikle mire ghar se

mire par bhī asar dekhā ye apnī ashk-bārī kā

bukHārāt-e-zamīñ uTh-uTh ke aksar gor par barse

rulāyā ham ko kyā kiyā be-vafā ne muñh na dikhlāyā

hamārī dīda-e-tar 'umr-bhar dīdār ko tarse

mirā qātil pilā.egā mujhe sharbat shahādat kā

ḳhabar ye kaun laayā hai bharo muñh us kā shakar se

jabīn-e-yār se afshāñ kī dekhī zarra-afshānī

ḳhushī ke phuul jhaḌte haiñ charāġh-e-māh-e-anvar se

na guzre chaar din bhī chain se us kī mohabbat meñ

bahut ro.e bahut piiTe bahut taḌpā bahut tarse

kaTī barsāt 'bahr' is saal bhī fariyād-o-shevan meñ

ḳhabar ham ko nahīñ bādal kidhar aa.e kidhar barse

KHuda ko yaad kar kyun multaji hai kimiya-gar se

ki sona KHak se hota hai paida la'l patthar se

ghazab mein jaan hai har-dam du'a karata hun dawar se

mohabbat jae dil se ye bala nikle mere ghar se

mere par bhi asar dekha ye apni ashk-bari ka

bukHaraat-e-zamin uTh-uTh ke aksar gor par barse

rulaya hum ko kya kiya be-wafa ne munh na dikhlaya

hamari dida-e-tar 'umr-bhar didar ko tarse

mera qatil pilaega mujhe sharbat shahadat ka

KHabar ye kaun laya hai bharo munh us ka shakar se

jabin-e-yar se afshan ki dekhi zarra-afshani

KHushi ke phul jhaDte hain charagh-e-mah-e-anwar se

na guzre chaar din bhi chain se us ki mohabbat mein

bahut roe bahut piTe bahut taDpa bahut tarse

kaTi barsat 'bahr' is sal bhi fariyaad-o-shewan mein

KHabar hum ko nahin baadal kidhar aae kidhar barse