hayat hai to magar wo hayat kyun na rahi

hayāt hai to magar vo hayāt kyuuñ na rahī

vo kaif-e-zīst vo 'ālam vo baat kyuuñ na rahī

taḌap rahā huuñ hazāroñ ġhamoñ ke saa.e meñ

vo chashm hāmil-e-sad-iltifāt kyuuñ na rahī

vo raat jis ko mohabbat kī raat kahte haiñ

mire jahāñ meñ vahī ek raat kyuuñ na rahī

dil-e-ḳharāb ko māyūsiyoñ ne luuT liyā

vo hasrat-e-karam-e-vāqi’āt kyuuñ na rahī

shurūa 'ishq-o-mohabbat kā daur are tauba

vahī jahān vahī kā.ināt kyuuñ na rahī

batā batā merī kashtī ke nā-ḳhudā ye batā

sukūñ kī lahar pas-e-vāqi’āt kyuuñ na rahī

hazār chāñd bhī tābāñ hai aur sitāre bhī

magar maiñ soch rahā huuñ ki raat kyuuñ na rahī

ye ġham hai ab ki ġham-e-'ishq dil se duur huā

sahr ke bhes meñ shām-e-nijāt kyuuñ na rahī

baḌhā na dāman-e-rañgīn-e-dost ai 'bahzād'

hazār haif un ashkoñ kī baat kyuuñ na rahī

hayat hai to magar wo hayat kyun na rahi

wo kaif-e-zist wo 'alam wo baat kyun na rahi

taDap raha hun hazaron ghamon ke sae mein

wo chashm hamil-e-sad-iltifat kyun na rahi

wo raat jis ko mohabbat ki raat kahte hain

mere jahan mein wahi ek raat kyun na rahi

dil-e-KHarab ko mayusiyon ne luT liya

wo hasrat-e-karam-e-waqi’at kyun na rahi

shurua 'ishq-o-mohabbat ka daur are tauba

wahi jahan wahi kainat kyun na rahi

bata bata meri kashti ke na-KHuda ye bata

sukun ki lahar pas-e-waqi’at kyun na rahi

hazar chand bhi taban hai aur sitare bhi

magar main soch raha hun ki raat kyun na rahi

ye gham hai ab ki gham-e-'ishq dil se dur hua

sahr ke bhes mein sham-e-nijat kyun na rahi

baDha na daman-e-rangin-e-dost ai 'bahzad'

hazar haif un ashkon ki baat kyun na rahi