husn ki zid se ghamon ko jawedan karna paDa

husn kī zid se ġhamoñ ko jāvedāñ karnā paḌā

apne 'ālam ko bahār-e-be-ḳhizāñ karnā paḌā

mai-kade meñ ehtirām-e-mai-kashāñ karnā paḌā

dil jahāñ jhūmā thā ik sajda vahāñ karnā paḌā

terī ḳhātir ye nigāh-e-dil-sitāñ karnā paḌā

kHaar ġhunchoñ ko bahāroñ ko ḳhizāñ karnā paḌā

apnī had se baḌh chalā jab kuchh niyāz-e-bandagī

ek sajda be-qiyām-e-āstāñ karnā paḌā

un kā andāz-e-taḳhātub ke tasadduq jā.iye

apne ashkoñ ko bhī zeb-e-dāstāñ karnā paḌā

jab gul-o-bulbul meñ kuchh thoḌī sī chashmak ho chalī

patta-patta ko chaman ke ham-zabāñ karnā paḌā

merī ḳhāmoshī ko jab tarz-e-kalām aane lagā

un kī mahfil meñ zabāñ ko be-zabāñ karnā paḌā

fasl-e-gul meñ ye ḳhayāl aatā hai aksar bār-bār

apne hī dāman ko ḳhud kyuuñ dhajjiyāñ karnā paḌā

'ishq kā e'jāz ai 'bahzād' muztar kyā kahūñ

beshtar mujh ko zamīñ kā āsmāñ karnā paḌā

husn ki zid se ghamon ko jawedan karna paDa

apne 'alam ko bahaar-e-be-KHizan karna paDa

mai-kade mein ehtiram-e-mai-kashan karna paDa

dil jahan jhuma tha ek sajda wahan karna paDa

teri KHatir ye nigah-e-dil-sitan karna paDa

kHar ghunchon ko bahaaron ko KHizan karna paDa

apni had se baDh chala jab kuchh niyaz-e-bandagi

ek sajda be-qiyam-e-astan karna paDa

un ka andaz-e-taKHatub ke tasadduq jaiye

apne ashkon ko bhi zeb-e-dastan karna paDa

jab gul-o-bulbul mein kuchh thoDi si chashmak ho chali

patta-patta ko chaman ke ham-zaban karna paDa

meri KHamoshi ko jab tarz-e-kalam aane laga

un ki mahfil mein zaban ko be-zaban karna paDa

fasl-e-gul mein ye KHayal aata hai aksar bar-bar

apne hi daman ko KHud kyun dhajjiyan karna paDa

'ishq ka e'jaz ai 'bahzad' muztar kya kahun

beshtar mujh ko zamin ka aasman karna paDa