kya ye surat-gari ai jazba-e-dil hoti jati hai

kyā ye sūrat-garī ai jazba-e-dil hotī jaatī hai

ki vo sūrat nigāhoñ ke muqābil hotī jaatī hai

jabīñ jhukne lagī hai har qadam par kū-e-jānāñ meñ

zahe qismat ki puurī hasrat-e-dil hotī jaatī hai

maza dene lagī hai sham’-o-parvāna kī bechainī

ye duniyā vāqif-e-asrār-e-mahfil hotī jaatī hai

ḳhudā rakhe ḳhudā rakhe yuuñ hī ye mauj-e-bahr-e-ġham

ba-zāhir mauj hai bātin meñ sāhil hotī jaatī hai

mujhe āvāz detī haiñ fazā.eñ yās-o-hirmāñ kī

mohabbat aur mushkil vaar mushkil hotī jaatī hai

kabhī naale kiye pahroñ kabhī aaheñ kabhī shevan

rasā.ī is tarah manzil ba-manzil hotī jaatī hai

tasavvur ne basāyā hai nayā 'ālam na.ī duniyā

merī tanhā.ī bhī ham-rañg-e-mahfil hotī jaatī hai

hamesha se guzārī hai taḌap kar zindagī ham ne

mohabbat sahl hī kab thī jo mushkil hotī jaatī hai

merī ġham-gushtagī 'bahzād' mujh ko raas aa.ī hai

ki mere vāste vārafta manzil hotī jaatī hai

kya ye surat-gari ai jazba-e-dil hoti jati hai

ki wo surat nigahon ke muqabil hoti jati hai

jabin jhukne lagi hai har qadam par ku-e-jaanan mein

zahe qismat ki puri hasrat-e-dil hoti jati hai

maza dene lagi hai sham’-o-parwana ki bechaini

ye duniya waqif-e-asrar-e-mahfil hoti jati hai

KHuda rakhe KHuda rakhe yun hi ye mauj-e-bahr-e-gham

ba-zahir mauj hai baatin mein sahil hoti jati hai

mujhe aawaz deti hain fazaen yas-o-hirman ki

mohabbat aur mushkil war mushkil hoti jati hai

kabhi nale kiye pahron kabhi aahen kabhi shewan

rasai is tarah manzil ba-manzil hoti jati hai

tasawwur ne basaya hai naya 'alam nai duniya

meri tanhai bhi ham-rang-e-mahfil hoti jati hai

hamesha se guzari hai taDap kar zindagi hum ne

mohabbat sahl hi kab thi jo mushkil hoti jati hai

meri gham-gushtagi 'bahzad' mujh ko ras aai hai

ki mere waste warafta manzil hoti jati hai