gham ko dushman dard ko na-mehrban samjha tha main

ġham ko dushman dard ko nā-mehrbāñ samjhā thā maiñ

haaye kun uThtī bahāroñ ko ḳhizāñ samjhā thā maiñ

ek hī sāġhar ne mujh par ye haqīqat khol dī

vo bhī mai-kash thā jise pīr-e-muġhāñ samjhā thā maiñ

sunñe vāloñ kī ḳhatā kyā thī na samjhā gar koī

ḳhud baḌī mushkil se apnī dāstāñ samjhā thā maiñ

haaye vo niklā merī chashm-e-tamannā kā sarāb

duur se jis ko ġhubār-e-kārvāñ samjhā thā maiñ

mujh ko miltā bhī to kis 'unvāñ se lutf-e-bandagī

sajde ko pāband-e-sañg-e-āstāñ samjhā thā maiñ

kyā ḳhabar thī āshiyāñ kī zad meñ haiñ ḳhud bijliyāñ

bijliyoñ kī zad meñ apnā āshiyāñ samjhā thā maiñ

hasratoñ kā thā janāza ārzūoñ kā mazār

haaye vo qatra jise ashk-e-ravāñ samjhā thā meñ

ek hī markaz pe the nāz-o-niyāz-e-’āshiqī

un ke qisse ko bhī apnī dāstān samjhā thā maiñ

ḳhatm hotī kis tarah 'bahzād' merī rah-ravī

rah-guzar thī jis ko manzil kā nishāñ samjhā thā maiñ

gham ko dushman dard ko na-mehrban samjha tha main

haye kun uThti bahaaron ko KHizan samjha tha main

ek hi saghar ne mujh par ye haqiqat khol di

wo bhi mai-kash tha jise pir-e-mughan samjha tha main

sunne walon ki KHata kya thi na samjha gar koi

KHud baDi mushkil se apni dastan samjha tha main

haye wo nikla meri chashm-e-tamanna ka sarab

dur se jis ko ghubar-e-karwan samjha tha main

mujh ko milta bhi to kis 'unwan se lutf-e-bandagi

sajde ko paband-e-sang-e-astan samjha tha main

kya KHabar thi aashiyan ki zad mein hain KHud bijliyan

bijliyon ki zad mein apna aashiyan samjha tha main

hasraton ka tha janaza aarzuon ka mazar

haye wo qatra jise ashk-e-rawan samjha tha mein

ek hi markaz pe the naz-o-niyaz-e-’ashiqi

un ke qisse ko bhi apni dastan samjha tha main

KHatm hoti kis tarah 'bahzad' meri rah-rawi

rah-guzar thi jis ko manzil ka nishan samjha tha main