bhala qadr-e-nigah-e-naz-e-jaanan kaun samjhega

bhalā qadr-e-nigāh-e-nāz-e-jānāñ kaun samjhegā

usī ko bā’is-e-taskīn-e-īmāñ kaun samjhegā

bahut se haiñ yahāñ par ḳhūn-e-hasrat dekhne vaale

mire dil ko charāġh-e-rāh-e-irfāñ kaun samjhegā

yahī do chaar haiñ jin ko mohabbat ne navāzā hai

jafā-e-dost ko duniyā meñ ehsāñ kaun samjhegā

yahāñ ḳhvāb-e-subuk ke dekhne vaale hī baste haiñ

jahāñ meñ mā’nī-e-kHvāb-e-pareshāñ kaun samjhegā

bahār aate hī ai dast-e-junūñ tū ne ġhazab Dhāyā

ki maiñ purze hī purze un ko dāmāñ kaun samjhegā

jo mere dil se khiñch kar aañkh tak aayā hai ik aañsū

ḳhudā jaane ki us qatra ko tūfāñ kaun samjhegā

ba-juz saaqī ke ai 'bahzād' nā-vāqif hai kul 'ālam

mere ashkoñ ko bhī mastī kā 'unvāñ kaun samjhegā

bhala qadr-e-nigah-e-naz-e-jaanan kaun samjhega

usi ko ba’is-e-taskin-e-iman kaun samjhega

bahut se hain yahan par KHun-e-hasrat dekhne wale

mere dil ko charagh-e-rah-e-irfan kaun samjhega

yahi do chaar hain jin ko mohabbat ne nawaza hai

jafa-e-dost ko duniya mein ehsan kaun samjhega

yahan KHwab-e-subuk ke dekhne wale hi baste hain

jahan mein ma’ni-e-kHwab-e-pareshan kaun samjhega

bahaar aate hi ai dast-e-junun tu ne ghazab Dhaya

ki main purze hi purze un ko daman kaun samjhega

jo mere dil se khinch kar aankh tak aaya hai ek aansu

KHuda jaane ki us qatra ko tufan kaun samjhega

ba-juz saqi ke ai 'bahzad' na-waqif hai kul 'alam

mere ashkon ko bhi masti ka 'unwan kaun samjhega