ab aur kyā talab kareñ apnī zabāñ se ham
sab kuchh to pā chuke haiñ tire āstāñ se ham
ghabrā ke kah diyā nigah-e-intizār ne
ab tak na kah sake the jo apnī zabāñ se ham
be-dil se be-ḳhayāl se be-e'tibār se
khelā kiye fazā-e-bahār-o-kHizāñ se ham
āġhāz-e-’ishq ye hai ki anjām-e-shauq hai
kuchh bad-gumāñ se vo haiñ to kuchh bad-gumāñ se ham
sad shukr phir qafas meñ bahalne lagā hai dil
mānūs ho chale haiñ ġham-e-āshiyāñ se ham
rūdād-e-zindagī meñ jo hai zikr-e-be-ḳhudī
ye vo jagah hai bhuul ga.e haiñ jahāñ se ham
'bahzād' zauq-o-shauq ke qurbān jā.iye
lipTe hue haiñ dāman-e-pīr-e-muġhāñ se ham
ab aur kya talab karen apni zaban se hum
sab kuchh to pa chuke hain tere aastan se hum
ghabra ke kah diya nigah-e-intizar ne
ab tak na kah sake the jo apni zaban se hum
be-dil se be-KHayal se be-e'tibar se
khela kiye faza-e-bahaar-o-kHizan se hum
aaghaz-e-’ishq ye hai ki anjam-e-shauq hai
kuchh bad-guman se wo hain to kuchh bad-guman se hum
sad shukr phir qafas mein bahalne laga hai dil
manus ho chale hain gham-e-ashiyan se hum
rudad-e-zindagi mein jo hai zikr-e-be-KHudi
ye wo jagah hai bhul gae hain jahan se hum
'bahzad' zauq-o-shauq ke qurban jaiye
lipTe hue hain daman-e-pir-e-mughan se hum
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
