mere chaman mein ghamon ki bahaar kyun na rahi

mere chaman meñ ġhamoñ kī bahār kyuuñ na rahī

'ajīb shai thī shab-e-intizār kyuuñ na rahī

jhukī-jhukī nazar aatī hai chashm-e-jalva talab

nazar ko hasrat-e-dīdār-e-yār kyuuñ na rahī

hai māñad-māñad se taare bhī aur zarre bhī

vo dil-farebī-e-lail-o-nahār kyuuñ na rahī

lahū kā naam bhī ashkoñ meñ ab nahīñ baaqī

vo dil-kashī-e-dil-e-dāġh-dār kyuuñ na rahī

na lab pe nāra-e-mastāna hai na nāla-e-shauq

vo mastī-e-dil-e-dīvāna-vār kyuuñ na rahī

kahāñ gayā mirā zauq-e-sujūd-o-shauq-e-talab

vo bandagī-e-dar-o-bām-e-yār kyuuñ na rahī

sukūñ milā hai to 'bahzād' sochtā huuñ maiñ

vo mujh pe rahmat-e-parvardigār kyuuñ na rahī

mere chaman mein ghamon ki bahaar kyun na rahi

'ajib shai thi shab-e-intizar kyun na rahi

jhuki-jhuki nazar aati hai chashm-e-jalwa talab

nazar ko hasrat-e-didar-e-yar kyun na rahi

hai manad-manad se tare bhi aur zarre bhi

wo dil-farebi-e-lail-o-nahaar kyun na rahi

lahu ka nam bhi ashkon mein ab nahin baqi

wo dil-kashi-e-dil-e-dagh-dar kyun na rahi

na lab pe nara-e-mastana hai na nala-e-shauq

wo masti-e-dil-e-diwana-war kyun na rahi

kahan gaya mera zauq-e-sujud-o-shauq-e-talab

wo bandagi-e-dar-o-baam-e-yar kyun na rahi

sukun mila hai to 'bahzad' sochta hun main

wo mujh pe rahmat-e-parwardigar kyun na rahi