aashna ban kar koi na-ashna hone laga

āshnā ban kar koī nā-āshnā hone lagā

is tarah puurā muqaddar kā likhā hone lagā

mīr-e-mastī ne ulaT dī kyuuñ bisāt-e-mai-kada

ai mere saaqī ye mai-ḳhāne meñ kyā hone lagā

ek vo jalva jo nazroñ meñ basā aur rah gayā

ek vo jalva jo nazroñ se judā hone lagā

baḌhte-baḌhte āstān-e-yār tak pahuñchī jabīñ

ghaT.te-ghaT.te phir sujūd-e-naqsh-e-pā hone lagā

ek vo din thā ki pinhāñ thā jamāl-e-rū-e-dost

ek ye din hai ki nazroñ se gilā hone lagā

āḳhirash rahtā kahāñ tak shām-e-'ishrat kā fareb

sub.h kā taarā haqīqat āshnā hone lagā

phir nigāh-e-nāz ai 'bahzād' uThī merī taraf

phir nigāh-e-shauq ko kuchh hausla hone lagā

aashna ban kar koi na-ashna hone laga

is tarah pura muqaddar ka likha hone laga

mir-e-masti ne ulaT di kyun bisat-e-mai-kada

ai mere saqi ye mai-KHane mein kya hone laga

ek wo jalwa jo nazron mein basa aur rah gaya

ek wo jalwa jo nazron se juda hone laga

baDhte-baDhte aastan-e-yar tak pahunchi jabin

ghaTte-ghaTte phir sujud-e-naqsh-e-pa hone laga

ek wo din tha ki pinhan tha jamal-e-ru-e-dost

ek ye din hai ki nazron se gila hone laga

aaKHirash rahta kahan tak sham-e-'ishrat ka fareb

subh ka tara haqiqat aashna hone laga

phir nigah-e-naz ai 'bahzad' uThi meri taraf

phir nigah-e-shauq ko kuchh hausla hone laga