tere malal se wo rah-o-rasm kyun na rahi

tire malāl se vo rāh-o-rasm kyuuñ na rahī

laboñ pe aah vo pahlī sī aah kyuuñ na rahī

tire sitam se baḌā mutma.in thā qalb-e-hazīñ

vo lazzat-e-karam-e-gāh gaah kyuuñ na rahī

jise bhī dekhiye ik zer-e-lab tabassum hai

mire ġhamoñ kī ye duniyā gavāh kyuuñ na rahī

ye kis ne aake ulaT dī bisāt-e-dard-o-alam

ye zindagī merī ākHir tabāh kyuuñ na rahī

sujūd-e-'ishq sujūd-e-vafā sujūd-e-ḳhayāl

ye zindagī bhī ba-nām-e-gunāh kyuuñ na rahī

hazār baar to aa.e the vajd meñ kaunain

jo jān-e-naġhma thī lab par vo aah kyuuñ na rahī

ye kaisā nūr-e-masarrat chamak uThā 'bahzād'

ġhazab huā terī duniyā tabāh kyuuñ na rahī

tere malal se wo rah-o-rasm kyun na rahi

labon pe aah wo pahli si aah kyun na rahi

tere sitam se baDa mutmain tha qalb-e-hazin

wo lazzat-e-karam-e-gah gah kyun na rahi

jise bhi dekhiye ek zer-e-lab tabassum hai

mere ghamon ki ye duniya gawah kyun na rahi

ye kis ne aake ulaT di bisat-e-dard-o-alam

ye zindagi meri aakHir tabah kyun na rahi

sujud-e-'ishq sujud-e-wafa sujud-e-KHayal

ye zindagi bhi ba-nam-e-gunah kyun na rahi

hazar bar to aae the wajd mein kaunain

jo jaan-e-naghma thi lab par wo aah kyun na rahi

ye kaisa nur-e-masarrat chamak uTha 'bahzad'

ghazab hua teri duniya tabah kyun na rahi