be-ḳhabar ko mere 'ālam kī ḳhabar ho to ga.ī
zulmat-e-shām-e-alam Dhal ke sahr ho to ga.ī
sun rahā huuñ ki vo aate haiñ kaleja thāme
aah sharminda-e-tāsīr-o-asar ho to ga.ī
dil kā ye haal hai jaise ki use hosh nahīñ
is taraf yaar kī duzdīda nazar ho to ga.ī
ek tūfāñ hai ki umDā sā chalā aatā hai
ġham kī takmīl mere dīda-e-tar ho to ga.ī
us kā kyuuñ rañj kareñ ġham meñ kaTī 'umr apnī
dil ne jis haal meñ chāhā thā basar ho to ga.ī
ab to hasrat hai na armāñ hai na ummīd na yaas
hastī-e-qalb-e-hazīñ zer-o-zabar ho to ga.ī
be-bulā.e chale aa.e vo mirī bālīñ par
dekh 'bahzād' mirī shaam sahr ho to ga.ī
be-KHabar ko mere 'alam ki KHabar ho to gai
zulmat-e-sham-e-alam Dhal ke sahr ho to gai
sun raha hun ki wo aate hain kaleja thame
aah sharminda-e-tasir-o-asar ho to gai
dil ka ye haal hai jaise ki use hosh nahin
is taraf yar ki duzdida nazar ho to gai
ek tufan hai ki umDa sa chala aata hai
gham ki takmil mere dida-e-tar ho to gai
us ka kyun ranj karen gham mein kaTi 'umr apni
dil ne jis haal mein chaha tha basar ho to gai
ab to hasrat hai na arman hai na ummid na yas
hasti-e-qalb-e-hazin zer-o-zabar ho to gai
be-bulae chale aae wo meri baalin par
dekh 'bahzad' meri sham sahr ho to gai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
