us kā banda huuñ jise qibla-numā kahte haiñ
jis ko alfāz-e-mohabbat meñ ḳhudā kahte haiñ
jis ke har rañg meñ andāz-e-masīhā.ī hai
jis ke har tarz ko 'ālam kī davā kahte haiñ
har nazar jis kī mudāvā-e-ġham-o-dard-o-alam
jis kī har baat ko e'jāz-numā kahte haiñ
jis ke mai-ḳhāne kā har jaam hai mastī bar lab
vo vo saaqī hai jise hosh-rubā kahte haiñ
jis ke qadmoñ pe tasadduq merā sar merī jabīñ
jis ke dar ko dar-e-takmīl-e-vafā kahte haiñ
jis kī har baat haqīqat hai haqīqat kī qasam
jis ke har taur ko ham shān-e-ḳhudā kahte haiñ
raaz kī baat batā duuñ ki baḌā raaz hai ye
us ko 'bahzād' 'azīz-e-dosrā kahte haiñ
us ka banda hun jise qibla-numa kahte hain
jis ko alfaz-e-mohabbat mein KHuda kahte hain
jis ke har rang mein andaz-e-masihai hai
jis ke har tarz ko 'alam ki dawa kahte hain
har nazar jis ki mudawa-e-gham-o-dard-o-alam
jis ki har baat ko e'jaz-numa kahte hain
jis ke mai-KHane ka har jam hai masti bar lab
wo wo saqi hai jise hosh-ruba kahte hain
jis ke qadmon pe tasadduq mera sar meri jabin
jis ke dar ko dar-e-takmil-e-wafa kahte hain
jis ki har baat haqiqat hai haqiqat ki qasam
jis ke har taur ko hum shan-e-KHuda kahte hain
raaz ki baat bata dun ki baDa raaz hai ye
us ko 'bahzad' 'aziz-e-dosra kahte hain
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
