ye kaun aa raha hai idhar muskuraata

ye kaun aa rahā hai idhar muskurātā

jahān-e-tamannā meñ halchal machātā

nigāhoñ meñ mastī qadam bahke-bahke

charāġh-e-mohabbat jalātā bujhātā

hijāboñ meñ Duubī huī be-hijābī

merī zindagī ko tamāshā banātā

nigāheñ payāmī adā.eñ salāmī

do 'ālam kā manzar nazar ko dikhātā

mubārak ho merī jabīn-e-vafā ko

har ik gaam par ek kā'ba banātā

fazā se barasne lagī haiñ bahāreñ

guloñ ko tarīq-e-tabassum sikhātā

do 'ālam ko sairāb kar dene vaalā

sharāb-e-mohabbat pilātā bahātā

kabhī mehr-e-kāmil kabhī qahr-e-kāmil

kabhī ruḳh dikhātā kabhī ruḳh chhupātā

shabāb mukammal nigār sarāpā

nigāhoñ se bachtā qazāon pe chhātā

ba-īñ zulf-e-mushkīñ ba-īñ rū-e-anvar

nigāhoñ kī be-chainiyoñ ko lubhātā

nigāheñ jhukā.e do 'ālam pe chhā.e

kabhī mujh ko khotā kabhī mujh ko paatā

vo raftār jaise ki bād-e-bahār

banātā miTātā miTātā banātā

fazā.eñ mo'attar huī jā rahī haiñ

havāoñ ko bhī nik.hatoñ se basātā

ba-har taur-e-kāmil ba-har rañg-e-qātil

jise qatl karatā usī ko jalātā

ḳhabar hī nahīñ mujh ko 'bahzād' apnī

ye kaun aa gayā hosh mere uḌātā

ye kaun aa raha hai idhar muskuraata

jahan-e-tamanna mein halchal machata

nigahon mein masti qadam bahke-bahke

charagh-e-mohabbat jalata bujhata

hijabon mein Dubi hui be-hijabi

meri zindagi ko tamasha banata

nigahen payami adaen salami

do 'alam ka manzar nazar ko dikhata

mubarak ho meri jabin-e-wafa ko

har ek gam par ek ka'ba banata

faza se barasne lagi hain bahaaren

gulon ko tariq-e-tabassum sikhata

do 'alam ko sairab kar dene wala

sharab-e-mohabbat pilata bahata

kabhi mehr-e-kaamil kabhi qahr-e-kaamil

kabhi ruKH dikhata kabhi ruKH chhupata

shabab mukammal nigar sarapa

nigahon se bachta qazaon pe chhata

ba-in zulf-e-mushkin ba-in ru-e-anwar

nigahon ki be-chainiyon ko lubhata

nigahen jhukae do 'alam pe chhae

kabhi mujh ko khota kabhi mujh ko pata

wo raftar jaise ki baad-e-bahaar

banata miTata miTata banata

fazaen mo'attar hui ja rahi hain

hawaon ko bhi nikhaton se basata

ba-har taur-e-kaamil ba-har rang-e-qatil

jise qatl karata usi ko jalata

KHabar hi nahin mujh ko 'bahzad' apni

ye kaun aa gaya hosh mere uData