kyā ḳhabar thī kisī kāfir se mohabbat hogī
kufr kī bhī mire īmāñ ko zarūrat hogī
rāhzan ne mujhe Therā ke ye raste meñ kahā
raah aisī hai ki rahbar kī na hājat hogī
be-piye mast huuñ maiḳhāne kā hai mujh se bharam
maiñ jo pī lūñgā to saaqī ko nadāmat hogī
āj-kal sehn-e-gulistāñ meñ hai jis baat kī dhuum
merā 'ālam mirī mastī mirī vahshat hogī
shauq-e-dīdār mirī taab nazar lā.egā kaun
aañkh uThā.ūñgā to jalvoñ ko nadāmat hogī
maiñ ne ghabrā ke agar kaam tasavvur se liyā
shām-e-ġham meñ hī 'ayāñ sub.h-e-masarrat hogī
kah do ḳhushiyoñ se ki 'bahzād' mujhe kar do mu'āf
maiñ samajhtā huuñ mujhe ġham se na fursat hogī
kya KHabar thi kisi kafir se mohabbat hogi
kufr ki bhi mere iman ko zarurat hogi
rahzan ne mujhe Thera ke ye raste mein kaha
rah aisi hai ki rahbar ki na hajat hogi
be-piye mast hun maiKHane ka hai mujh se bharam
main jo pi lunga to saqi ko nadamat hogi
aaj-kal sehn-e-gulistan mein hai jis baat ki dhum
mera 'alam meri masti meri wahshat hogi
shauq-e-didar meri tab nazar laega kaun
aankh uThaunga to jalwon ko nadamat hogi
main ne ghabra ke agar kaam tasawwur se liya
sham-e-gham mein hi 'ayan subh-e-masarrat hogi
kah do KHushiyon se ki 'bahzad' mujhe kar do mu'af
main samajhta hun mujhe gham se na fursat hogi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
