pesh-e-nigah-e-shauq wo surat hai aaj-kal

pesh-e-nigāh-e-shauq vo sūrat hai āj-kal

duniyā mire ḳhayāl kī jannat hai āj-kal

ik sañg-e-dar ko hai mire sajdoñ kī aarzū

merā nasīb hai mirī qismat hai āj-kal

aisā phañsā huā huuñ fareb-e-ḳhayāl meñ

jaise ki har qadam mujhe hai āj-kal

ḳhushiyāñ kuchh is tarah se 'atā kiiñ karīm ne

kahnā paḌā ki ġham kī zarūrat hai āj-kal

is chashm-e-nāz meñ bhī haiñ aañsū bhare ek

badlā huā nizām-e-mohabbat hai āj-kal

vo chhā ga.e haiñ kaun-o-makāñ par kuchh is tarah

mujh ko har ek zarra se ulfat hai āj-kal

raftār-e-nāz-e-yār ke 'bahzād' maiñ nisār

jis samt dekhtā huuñ qayāmat hai āj-kal

pesh-e-nigah-e-shauq wo surat hai aaj-kal

duniya mere KHayal ki jannat hai aaj-kal

ek sang-e-dar ko hai mere sajdon ki aarzu

mera nasib hai meri qismat hai aaj-kal

aisa phansa hua hun fareb-e-KHayal mein

jaise ki har qadam mujhe hai aaj-kal

KHushiyan kuchh is tarah se 'ata kin karim ne

kahna paDa ki gham ki zarurat hai aaj-kal

is chashm-e-naz mein bhi hain aansu bhare ek

badla hua nizam-e-mohabbat hai aaj-kal

wo chha gae hain kaun-o-makan par kuchh is tarah

mujh ko har ek zarra se ulfat hai aaj-kal

raftar-e-naz-e-yar ke 'bahzad' main nisar

jis samt dekhta hun qayamat hai aaj-kal