raunaq-e-bazm-e-jahan teri tamanna KHatm-shud

raunaq-e-bazm-e-jahāñ terī tamannā ḳhatm-shud

ek jalva thā nazar meñ vo bhī jalva ḳhatm-shud

chāñd khiḌkī pe mirī ab karne aa.e haiñ fuġhāñ

maiñ bhalā us se kahūñ kyā haañ vo rishta ḳhatm-shud

kaash isrāfīl kā mujh ko ḳhudā de de maqām

suur phūñkūñ aur kahūñ maiñ le ye duniyā ḳhatm-shud

pīr-e-kāmil aap se pī luuñ jo maiñ āb-e-hayāt

phir pilā kar us ko pūchhūñ jī tamannā ḳhatm-shud

manqabat nā't-o-kalām-o-marsiya aur shā'irī

aap kā thā jo bhī hissa kyā vo hissa ḳhatm-shud

kitnī jaldī aa ga.ī thī shām-e-furqat haaye re

maiñ abhī so ke uThā thā aur ye qissa ḳhatm-shud

kyā pata vo kal mileñ yā ab mileñ roz-e-hisāb

yā 'alī mushkil-kushā kar do ye vaqfa ḳhatm-shud

’īd-o-ramazāñ haj moharram saal kā har ek din

yā'nī tere bin kaTeñge to vo sapnā ḳhatm-shud

ek hasrat ek chāhat aarzū ab bhī vahī

tere siine pe ho sar phir dard-e-sar kā ḳhatm-shud

maiñ huuñ sālār-e-vafā tum ho imām-e-bā-hayā

tum ne kyā sochā ki hogā 'ahd-e-fardā ḳhatm-shud

us valī ke dar se māñgī tum vahī fariyād ho

mat samajhnā tum kabhī hogā ye rishta ḳhatm-shud

lauT aanā jab bhī chāho dar khulā hai hashr tak

mat kabhī ye sochnā hai ghar kā rasta ḳhatm-shud

naam hai 'iqbāl' merā aur usī kā hai asar

ho bhalā kyuuñ mere lahje se ye shikva ḳhatm-shud

raunaq-e-bazm-e-jahan teri tamanna KHatm-shud

ek jalwa tha nazar mein wo bhi jalwa KHatm-shud

chand khiDki pe meri ab karne aae hain fughan

main bhala us se kahun kya han wo rishta KHatm-shud

kash israfil ka mujh ko KHuda de de maqam

sur phunkun aur kahun main le ye duniya KHatm-shud

pir-e-kaamil aap se pi lun jo main aab-e-hayat

phir pila kar us ko puchhun ji tamanna KHatm-shud

manqabat na't-o-kalam-o-marsiya aur sha'iri

aap ka tha jo bhi hissa kya wo hissa KHatm-shud

kitni jaldi aa gai thi sham-e-furqat haye re

main abhi so ke uTha tha aur ye qissa KHatm-shud

kya pata wo kal milen ya ab milen roz-e-hisab

ya 'ali mushkil-kusha kar do ye waqfa KHatm-shud

’id-o-ramazan haj moharram sal ka har ek din

ya'ni tere bin kaTenge to wo sapna KHatm-shud

ek hasrat ek chahat aarzu ab bhi wahi

tere sine pe ho sar phir dard-e-sar ka KHatm-shud

main hun salar-e-wafa tum ho imam-e-ba-haya

tum ne kya socha ki hoga 'ahd-e-farda KHatm-shud

us wali ke dar se mangi tum wahi fariyaad ho

mat samajhna tum kabhi hoga ye rishta KHatm-shud

lauT aana jab bhi chaho dar khula hai hashr tak

mat kabhi ye sochna hai ghar ka rasta KHatm-shud

nam hai 'iqbaal' mera aur usi ka hai asar

ho bhala kyun mere lahje se ye shikwa KHatm-shud