ai chaara-gar-e-shauq koi aisi dawa de

ai chāra-gar-e-shauq koī aisī davā de

jo dil se har ik ġhair kī chāhat ko bhulā de

bas dekh liyā duniyā ke rishtoñ kā tamāshā

maḳhlūq se ummīd ke sab diip bujhā de

pākīza tamannā.eñ bhī laatī haiñ udāsī

har zauq-e-talab shauq-e-tamannā hī miTā de

ik maiñ huuñ faqat tū ho aur 'ālam-e-hū ho

ai husn-e-azal saare hijābāt uThā de

hai ruuh ko har lamha tere vasl kī ummīd

aa ziist kī shab ko kabhī sub.h banā de

kyuuñ nek gumānoñ ke sahāre pe ji.eñ ham

in saare fareboñ ko sarāboñ ko haTā de

dekhe yā na dekhe ye to mahbūb kā haq hai

na tū āh-o-fuġhāñ kar na tū ġhairoñ sā gila de

de lazzat-e-dīdār kī mad-hoshī meñ vo hosh

jo hastī kī tā'rīf-o-ta'ayyun ko gañvā de

maiñ ḳhud bhī kabhī DhūñDh na pā.ūñ ḳhud ko

yuuñ ātish-e-sozāñ se merī raakh jalā de

huuñ hasrat-e-dīd liye tirī dahlīz pe kab se

ik baar karam kī nazar kar har ik parda uThā de

kyuuñ huuk sī uThtī hai dil-e-zār meñ 'tāhir'

is hastī-e-vīrāñ ke ḳhas-o-ḳhāshāk jalā de

ai chaara-gar-e-shauq koi aisi dawa de

jo dil se har ek ghair ki chahat ko bhula de

bas dekh liya duniya ke rishton ka tamasha

maKHluq se ummid ke sab dip bujha de

pakiza tamannaen bhi lati hain udasi

har zauq-e-talab shauq-e-tamanna hi miTa de

ek main hun faqat tu ho aur 'alam-e-hu ho

ai husn-e-azal sare hijabaat uTha de

hai ruh ko har lamha tere wasl ki ummid

aa zist ki shab ko kabhi subh bana de

kyun nek gumanon ke sahaare pe jien hum

in sare farebon ko sarabon ko haTa de

dekhe ya na dekhe ye to mahbub ka haq hai

na tu aah-o-fughan kar na tu ghairon sa gila de

de lazzat-e-didar ki mad-hoshi mein wo hosh

jo hasti ki ta'rif-o-ta'ayyun ko ganwa de

main KHud bhi kabhi DhunDh na paun KHud ko

yun aatish-e-sozan se meri rakh jala de

hun hasrat-e-did liye teri dahliz pe kab se

ek bar karam ki nazar kar har ek parda uTha de

kyun huk si uThti hai dil-e-zar mein 'tahir'

is hasti-e-viran ke KHas-o-KHashak jala de