mausuf sifat mein pinhan hai tanqid gawara kaise ho

mausūf sifat meñ pinhāñ hai tanqīd gavārā kaise ho

hai dīd-e-butāñ dīdār-e-ḳhudā inkār kā yaarā kaise ho

ham mānñe vaale sūrat ke jo maz.har hai be-sūrat kā

sajda na kareñ gar sūrat ko phir apnā guzāra kaise ho

gir gir ke sambhalte haiñ lekin nazroñ kā tasādum qaa.im hai

jo ek jhalak se gir jaa.e dīdār dobāra kaise ho

dīvāne to bante haiñ lākhoñ thā qais faqat ik dīvāna

jis baat meñ lailā kā zikr nahīñ vo baat gavārā kaise ho

hai yaad tirī īmān mirā manzūr hai har farmān tirā

jis dar se banī taqdīr mirī us dar se kinārā kaise ho

ham hashr ke din ban jā.eñge muhtāj-e-du’ā mohtāj-e-nazar

jinheñ 'qādrī' zo'm 'ibādat kā rahmat kā ishārā kaise ho

mausuf sifat mein pinhan hai tanqid gawara kaise ho

hai did-e-butan didar-e-KHuda inkar ka yara kaise ho

hum manne wale surat ke jo mazhar hai be-surat ka

sajda na karen gar surat ko phir apna guzara kaise ho

gir gir ke sambhalte hain lekin nazron ka tasadum qaim hai

jo ek jhalak se gir jae didar dobara kaise ho

diwane to bante hain lakhon tha qais faqat ek diwana

jis baat mein laila ka zikr nahin wo baat gawara kaise ho

hai yaad teri iman mera manzur hai har farman tera

jis dar se bani taqdir meri us dar se kinara kaise ho

hum hashr ke din ban jaenge muhtaj-e-du’a mohtaj-e-nazar

jinhen 'qadri' zo'm 'ibaadat ka rahmat ka ishaara kaise ho