kakul jo uski shola-e-rukH se sarak gai

kākul jo us kī sho'la-e-rukH se sarak ga.ī

kaalī ghaTā meñ saaf ye bijlī chamak ga.ī

maiñ ne jo āh-e-sard bharī us ne hañs diyā

gun kī kalī nasīm-e-sahar se chaTak ga.ī

pahuñchī na us ke kaan talak aah nā-rasā

kyā fā.eda zamīñ se agar tā-falak ga.ī

TukḌe huā hai merā garebān sabr se

añgḌā.ī lī jo yaar kī cholī masak ga.ī

ba.ad-az fanā jo qabr pe aayā vo ai 'vazīr'

phuñchāne us ko ruuh merī qabr tak ga.ī

kakul jo us ki sho'la-e-rukH se sarak gai

kali ghaTa mein saf ye bijli chamak gai

main ne jo aah-e-sard bhari us ne hans diya

gun ki kali nasim-e-sahar se chaTak gai

pahunchi na us ke kan talak aah na-rasa

kya faeda zamin se agar ta-falak gai

TukDe hua hai mera gareban sabr se

angDai li jo yar ki choli masak gai

baad-az fana jo qabr pe aaya wo ai 'wazir'

phunchane us ko ruh meri qabr tak gai