bach bach ke jahan ki nazron se wo mera taDapna bhul gai

bach bach ke jahāñ kī nazroñ se vo merā taḌapnā bhuul ga.ī

jo baat ki sab par zāhir thī vo baat bhī duniyā bhuul ga.ī

tūfāñ se bachāyā thā lekin phir khel rahī hai tūfāñ se

kashtī bhī mirī kyā kashtī hai sāhil pe Thaharnā bhuul ga.ī

kyā shart-e-vafā ye hai batlā kyuuñ ashkoñ kā āḳhir taar bandhā

afsos hai ai chashm-e-pur-nam tū un kā ishāra bhuul ga.ī

ai merī jabīn-e-nādāñ jabīñ rakhtā huuñ kahīñ paḌtī hai kahīñ

dekhā jo unheñ yuuñ be-parda ghabrā ga.ī sajda bhuul ga.ī

vo aañkh ke jis ne parkhā thā samjhā thā hamārā rāz-e-dil

ai 'rāz' mazā to ye dekho vo raaz hamārā bhuul ga.ī

bach bach ke jahan ki nazron se wo mera taDapna bhul gai

jo baat ki sab par zahir thi wo baat bhi duniya bhul gai

tufan se bachaya tha lekin phir khel rahi hai tufan se

kashti bhi meri kya kashti hai sahil pe Thaharna bhul gai

kya shart-e-wafa ye hai batla kyun ashkon ka aaKHir tar bandha

afsos hai ai chashm-e-pur-nam tu un ka ishaara bhul gai

ai meri jabin-e-nadan jabin rakhta hun kahin paDti hai kahin

dekha jo unhen yun be-parda ghabra gai sajda bhul gai

wo aankh ke jis ne parkha tha samjha tha hamara raaz-e-dil

ai 'raaz' maza to ye dekho wo raaz hamara bhul gai