pa kar tujhe apne ko main kya bhul gaya hun

pā kar tujhe apne ko maiñ kyā bhuul gayā huuñ

har sū do-zabān-e-dosrā bhuul gayā huuñ

aatā hai ḳhudā bhī tire sadqa meñ mujhe yaad

goyā ki ba-zāhir maiñ ḳhudā bhuul gayā huuñ

'ālam ke tamāshe nahīñ ab jāzib-e-dil haiñ

har lazzat-e-hastī kā mazā bhuul gayā huuñ

ab mas.a.la-e-kasrat-o-vahdat ko meñ samjhā

pā kar tujhe sab tere sivā bhuul gayā huuñ

sajda taraf-e-ka.aba hai dil terī taraf hai

ab qibla bhī ai qibla-numā bhuul gayā huuñ

hal jab se huā falsafa-e-husn-e-haqīqat

har mas.ala ai zehn-e-rasā bhuul gayā huuñ

hai aao sahar-gāh meñ do zauq lab-o-gosh

chañg-o-nai-e-o-barbat kī sadā bhuul gayā huuñ

manzūr tirī chashm-e-razā jab se huī hai

ummīd-e-jazā ḳhauf-e-sazā bhuul gayā huuñ

ai rahbar-e-taufīq mujhe raah batā de

naqsh-e-qadam-e-rāh-numā bhuul gayā huuñ

ai ḳhizr mirā qāfila kis samt gayā hai

tamīz-e-sadā-hā-e-darā bhuul gayā huuñ

ulTā hai varaq aaj se afsāna-e-nau kā

afsāna-e-pārīna-dilā bhuul gayā huuñ

pa kar tujhe apne ko main kya bhul gaya hun

har su do-zaban-e-dosra bhul gaya hun

aata hai KHuda bhi tere sadqa mein mujhe yaad

goya ki ba-zahir main KHuda bhul gaya hun

'alam ke tamashe nahin ab jazib-e-dil hain

har lazzat-e-hasti ka maza bhul gaya hun

ab masala-e-kasrat-o-wahdat ko mein samjha

pa kar tujhe sab tere siwa bhul gaya hun

sajda taraf-e-kaba hai dil teri taraf hai

ab qibla bhi ai qibla-numa bhul gaya hun

hal jab se hua falsafa-e-husn-e-haqiqat

har masala ai zehn-e-rasa bhul gaya hun

hai aao sahar-gah mein do zauq lab-o-gosh

chang-o-nai-e-o-barbat ki sada bhul gaya hun

manzur teri chashm-e-raza jab se hui hai

ummid-e-jaza KHauf-e-saza bhul gaya hun

ai rahbar-e-taufiq mujhe rah bata de

naqsh-e-qadam-e-rah-numa bhul gaya hun

ai KHizr mera qafila kis samt gaya hai

tamiz-e-sada-ha-e-dara bhul gaya hun

ulTa hai waraq aaj se afsana-e-nau ka

afsana-e-parina-dila bhul gaya hun